`नाताळाच्या शुभेच्छा देऊ नका कारण आपण हिंदू आहोत आणि ख्रिश्चन मंडळी मोठ्या प्रमाणावर हिंदूविरोधी कारवाया करीत आहेत.' अशा आशयाच्या पोस्ट वाचून, चर्चा वाचून मनात आले किती विसंगत आहे हे म्हणणे. म्हणजे ख्रिश्चन मंडळी हिंदूविरोधी कारवाया करीत आहेत हे अगदी खरे आहे, पण म्हणून नाताळाच्या शुभेच्छा न देणे न पटणारे आहे. आपले मित्र-मैत्रिणी, सहकारी, शेजारी कोणी ख्रिश्चन असतील तर त्यांना शुभेच्छा द्यायलाच हव्यात. आपण हिंदू आहोत म्हणूनच आपण नाताळाच्या शुभेच्छा देतो, देऊ शकतो, द्यायला हव्यात. आपण तसे नाही केले तर आपले हिंदुपण खऱ्या अर्थाने उरणार नाही, जपले जाणार नाही. त्याचवेळी सगळ्या जगाला ख्रिश्चन बनवण्याचे जे उद्योग आहेत त्यांना विरोध करून तसे होऊ नये यासाठी उपाययोजना करायला हवी. मनात दुसऱ्याचा राग वा द्वेष न बाळगता, अयोग्य गोष्टींना विरोध आणि त्यांचा बंदोबस्त करणे; सोबतच- सर्व चराचराबद्दल आत्मीयतायुक्त व्यवहार हेच हिंदुपण आहे. अयोग्य गोष्टीला विरोध करण्याचे सामर्थ्यही असायला हवे आणि सगळ्यांबद्दल आत्मियता बाळगण्याचे मोठेपण अन उमदेपणही हवे. नाव हिंदू राखून ख्रिश्चनांसारखे वागायचे, की ख्रिश्चन बहिरंगात आंतरिक हिंदुपण निर्माण करायचे? इतरांना शुभेच्छाही देण्याची दानत नसणे हे ख्रिश्चन वा अन्य संकुचित विचारांचे लक्षण आहे, हिंदूंच्या व्यापक वैश्विक विचारांचे ते लक्षण नाही.
- श्रीपाद कोठे
२५ डिसेंबर २०१४
कोणत्याही टिप्पण्‍या नाहीत:
टिप्पणी पोस्ट करा