राजदीप सरदेसाई फेसबुकवर trending क्रमांक १ वर दिसत आहेत. `मी बीफ खातो. त्यामुळे मी राष्ट्रविरोधी आहे', असे त्याने छाती काढून म्हटल्याचे त्यात दाखवत आहे. अभारतीय विचारांनी पोसलेली बुद्धीशून्यता आणि मूर्खपणा त्याच्या या वाक्यातून झळकतात. त्याने हे वाक्य कोणत्याही अर्थाने अन कशासाठीही म्हटले असो, पण तो राष्ट्रविरोधी आहेच. अन त्याचे कारण त्याचे बीफ खाणे नाही. तर त्याचा उन्माद आणि उन्मत्तपणा हे आहे. `मी कोणाचाही अन कशाचाही विचार करणार नाही. माझ्या मनास येईल ते करीन. शिवाय ते करताना ज्यांना ते पटत नाही त्यांना जाणीवपूर्वक दुखावेन', हा जो उर्मटपणा अन उन्मत्तपणा आहे; तो या राष्ट्राचा स्वभाव नव्हता, नाही. ते या राष्ट्राचे लक्षण नाही. राजदीप या राष्ट्राचा स्वभाव आणि लक्षण यांच्या विरोधी वागत असल्याने तो राष्ट्रविरोधी आहे. अभारतीय विचारांनी गेल्या शतकभराहून अधिक काळ या राष्ट्राला विकृत करण्याचा जो प्रयत्न केला त्याचे हे परिणाम आहेत. अन्यथा, गोमांसच नव्हे एकूणच मांसाहारापासून लोकांना दूर करण्याचे प्रयत्न या देशातील हजारो, लाखो लोकांनी गेली हजारो वर्षे केले आहेत. माकडातून उत्क्रांत झालेल्या माणसाला याच्याही पुढे ईशत्वाकडे नेण्याच्या प्रयत्नाचा तो एक भाग होता व आहे. महात्मा गौतम बुद्ध असोत, महात्मा महावीर असोत की महात्मा गांधी; सगळ्यांनी हा प्रयत्न केला. पण या प्रयत्नांनाही संघ परिवाराचा अजेंडा ठरवताना आपण केवढे बुद्धीदारिद्र्य दाखवीत आहोत याचेही भान या तर्कटांना राहत नाही. मांसाहारच नव्हे, व्यक्त आणि अव्यक्त स्वरूपातल्या असंख्य अशा गोष्टी आहेत, ज्या माणसात, समाजात आहेत. पण त्या अंतिम नाहीत. त्या दूर सारून पुढे जाणे म्हणजे मानवाचा महात्मा होणे आहे. या देशात असे कोट्यवधी महात्मे अज्ञात भूतकाळापासून होत आलेले आहेत. त्यांनीच माणसाचे दिव्य स्वरूप सगळ्या समाजापुढे प्रत्यक्ष उदाहरणातून ठेवले आहे. सगळे अभारतीय विचार माणसाचे हे दिव्यत्व नाकारून त्याचे माकडचाळे उचलून धरतात. भारतीय व्यक्तीस्वातंत्र्य मनुष्याला दिव्यत्वाकडे जाण्याचा विचार देते, अभारतीय व्यक्तीस्वातंत्र्य माणसाला पुन्हा माकड होण्याचा उपदेश देते. राजदीप या अभारतीय व्यक्तीस्वातंत्र्याचा उद्घोष करतो; म्हणूनच तो राष्ट्रविरोधी आहे. त्याने त्रागा केला तरी, अन न केला तरीही.
- श्रीपाद कोठे
१९ फेब्रुवारी २०१६
कोणत्याही टिप्पण्‍या नाहीत:
टिप्पणी पोस्ट करा