`अंधार हेच हत्यार' या शीर्षकाचा एक मजकूर दुपारी आला. अमोल पालेकर यांना जे भाषण करण्यापासून थांबवले ते हे भाषण आहे, अशी माहिती सोबत आहे. जर खरंच हे ते भाषण असेल तर ते गंभीर, विरोधी विचार बाळगणाऱ्या लोकांनी चिंता करण्याजोगे, आक्षेपार्ह इत्यादी इत्यादी काहीही नसून हास्यास्पद तेवढे आहे. हा मजकूर वाचून मला तर त्यांना थांबवणाऱ्या लोकांची आणखीनच गंमत वाटली. आयोजकांची पण काही भूमिका आता पुढे आलेली आहे. पण खरे कारण सगळ्यांचा थोडा वेळ वाचावा हेच असू शकते. अर्थात हा माझा अंदाज. या मजकुरात २०१९ च्या निवडणुकीचा अन त्यात घ्यायच्या भूमिकेचा स्पष्ट उल्लेख आहे. त्यामुळे तर सारेच स्पष्ट होते. माझे मत असे की, अशा गोष्टी `let it be' अशा भूमिकेतून पहाव्या, चालू द्याव्या. त्याने संबंधितांचे विरेचन होईल, उगाच अभिव्यक्ती स्वातंत्र्याचे मारेकरी इत्यादी ठपके बसणार नाहीत, दूध का दूध होत राहील. खोट्या प्रतिमा गळून पडतील. आविर्भाव निकालात निघतील. अन पालेकर किंवा त्यांच्यासारख्या भूमिका असणाऱ्यांनी जसे लोकांना गृहित धरू नये तसेच त्याहून वेगळी भूमिका असणाऱ्यांनीही लोकांना गृहित धरू नये. हा किंवा तो कोणीच लोकांना फसवू शकत नाही. लोक स्वत: विचार करत असतात, समजून घेत असतात, अर्थ लावत असतात. फार तर आपली भूमिका मांडावी पण उगाच भांडून अन विरोध करून शक्तीक्षय करू नये.
(टीप- आजच, काल लिहून झालेली `अंधाराची मिठी' ही कविता पोस्ट केली आहे. त्या कवितेचा अन `अंधार हेच हत्यार' याचा काहीही संबंध नाही. अन एका पृच्छकाला सांगितले तसे, ही कविता सुखासीन झोपेवरची आहे असे समजायलाही हरकत नाही. 😃😃 )
- श्रीपाद कोठे
१३ फेब्रुवारी २०१९
कोणत्याही टिप्पण्‍या नाहीत:
टिप्पणी पोस्ट करा