रा. स्व. संघाचे अखिल भारतीय अधिकारी श्री. सुनील आंबेकर यांनी नुकतेच the rss roadmaps for the twentyfirst century हे पुस्तक लिहिले आहे. नागपूर तरुण भारत दर रविवारी त्याचा भावानुवाद क्रमशः प्रकाशित करीत आहे. आज जो मजकूर प्रसिद्ध झाला आहे त्याची सुरुवातच संघाच्या religion विषयीच्या भूमिकेने आहे. त्याहून महत्वाचे म्हणजे, या संबंधात संघ आणि हिंदू महासभा यांच्या विचारात गंभीर फरक आहे; असे स्पष्टपणे म्हटले आहे.
हे मुळातून वाचले पाहिजे. हा विषय व्यापक पद्धतीने समजून घेतला पाहिजे. संघ समजून घेणे, हिंदुत्व आणि त्याचे प्रवाह समजून घेणे, भारत आणि भारताचा इतिहास आणि वर्तमान समजून घेणे, सुस्पष्ट वैचारिकता आणि भविष्य; या सगळ्या अंगांनी हा विषय समजून घ्यायला हवा. ही अपेक्षा सगळ्यांकडूनच असली तरीही, स्वयंसेवक असल्याचा गौरव असणाऱ्यांकडून विशेष आहे. सध्या सुरू असलेल्या विषयात; मंदिरांचा पैसा अन्य धर्मियांसाठी कशाला, नास्तिकांना कशाला मंदिर संपत्तीची उठाठेव; इत्यादी जे विषय येतात त्यावरही; संघाची भूमिका काय असू शकते याचा अदमास घेण्यासाठी हा विषय मुळातून समजून घेतला पाहिजे.
याच भावानुवादात पंडित नेहरू यांच्या १९४८ सालच्या एका भाषणाचा परिच्छेद देण्यात आला आहे. संघ आणि नेहरू यांच्या भूमिकेतील साधर्म्य दाखवण्यासाठी. 'स्वीकार्यता' काय असते आणि संघाच्या संदर्भात ती कशी आहे; हे विरोधकांनी आणि स्वयंसेवक व समर्थकांनी समजून घेणेही आवश्यक आहे.
- श्रीपाद कोठे
१७ मे २०२०
कोणत्याही टिप्पण्‍या नाहीत:
टिप्पणी पोस्ट करा