स्टीफन हॉकिंग नास्तिक होते असे म्हणतात. वास्तविक हा भारतबाह्य दृष्टीकोन झाला. कारण त्यांच्या नास्तिकतेचा संबंध ईश्वराशी आणि त्यांच्या ईश्वर कल्पनेशी आहे. आस्तिक याचा भारतीय अर्थ आहे - या जगाच्या रूपाने आपल्याला जे काही प्रतीत होतं ते काही तरी आहे. अन नास्तिक म्हणजे- आपल्या अनुभवाला येतं ते सारं भ्रम असून त्याला वास्तविक अस्तित्व नाही. आस्तिक याचा अर्थ अस्तित्व असणे अन नास्तिक याचा अर्थ अस्तित्व नसणे. या भारतीय दृष्टीने कोणताही वैज्ञानिक नास्तिक असूच शकत नाही. ते सारेच आस्तिक ठरतात कारण आपल्या अनुभवाला येणारं, प्रतीत होणारं जे आहे त्याला काही ना काही अस्तित्व आहे यावर त्यांचा अतूट विश्वास असतो. म्हणूनच ते अस्तित्व शोधून काढण्याचा, त्याचा ठाव घेण्याचा, त्याला आपल्या मुठीत पकडण्याचा, त्यावर स्वामित्व मिळवण्याचा प्रयत्न करीत असतात. ते शक्य आहे वा नाही इत्यादी विषय वेगळे. पण काही ना काही अस्तित्वात आहे अन ते हाती लागायला हवं असं मानूनच त्यांचे प्रयत्न होत असतात. त्यांना नास्तिक कसं म्हणायचं?
- श्रीपाद कोठे
१५ मार्च २०१८
कोणत्याही टिप्पण्‍या नाहीत:
टिप्पणी पोस्ट करा